هل تريد التفاعل مع هذه المساهمة؟ كل ما عليك هو إنشاء حساب جديد ببضع خطوات أو تسجيل الدخول للمتابعة.



 
الرئيسيةالرئيسية  البوابةالبوابة  أحدث الصورأحدث الصور  التسجيلالتسجيل  دخولدخول  

شاطر
 

 فاتت الحملة........

استعرض الموضوع التالي استعرض الموضوع السابق اذهب الى الأسفل 
كاتب الموضوعرسالة
عبد الله الدهيمي
منصوري نشيط
منصوري نشيط
عبد الله الدهيمي

الجنس الجنس : ذكر
عدد الرسائل عدد الرسائل : 42
العمر العمر : 66
العمل/الترفيه : مدير مدرسة ابتدائية عمومية
المدينة : كلميم - المغرب
البلد البلد : فاتت الحملة........ 1moroc10
الهواية : فاتت الحملة........ Readin10
تاريخ التسجيل : 08/09/2010
نقاط نقاط : 63
الوسام وسام التميز

فاتت الحملة........ Empty
مُساهمةموضوع: فاتت الحملة........   فاتت الحملة........ I_icon_minitimeالسبت مارس 17, 2012 3:38 pm

بسم الله الرحمان الرحيم
"فاتت الحملة"


راسو سخون ....
عقله مجنون



قوله موزون .... عايش مغبون
كيڭولو...بوهالي
*********************
سولتو على الرشوة
ڭال لي مرض ماعنده دوا
شي ڭال عنها هدية
وشي سماها قهوة
وشي ڭال ليها...للا ومالي
*********************
ڭلت ليه هذي حملة ...
ضد الرشوة
كلشي نطق و ڭال ...
كلشي دوى
ڭال لي ...خليني في حالي
*********************
ڭالو هذو صبيان صغار
هما يوصلو الاخبــــــار
يڭولو للناس الكبــــــار
الرشوة حشومة وعار
وعمرها ما تحلى لي
**********************
حاربو الرشوة في المـدارس
وخلاوها في الكوالـــــــــيس
تكون حلاوة إلا كانت غالية
وتكون رشوة إلا ثمنها رخيص
ما تسمع غير هاك وارى لي
**************************
إلا بغيت تعرف الرشوة... وبعينيك تشوف
ادخل لشي إدارة وجرب...تخرج منتـــوف
تصرف واجي احكي لي
**************************
ما تاخذ ورقة حتى ... تعـــــــطي اوراق
ما تقضي حاجة حتى... تصاب بالإرهاق
وتروح في العشية مسالي
**************************
اطلع واهبط أجي اليوم... وغـــــدّا
بنية مقصودة يطولو عليك... المدّة
والباب للي تقصده تلقاه مكالي
*************************
أما "التنابر" عند " الڭارديان " ...يتباعـــــو
ب"المارشي نوار" وتسمع مازال صداعــــــو
الورقة " تڭيليزات " وللي يوقع ما مسالي
**************************
قدام الإدارة شفت ناس
واقفين جمهور...
سولت ڭالو شهود يشهدو
كان حق أو زور...
الواحد منهم مرة علي مرة
حْماد مرة قدور...
بالمال باع حياته ونفسه
والضمير المقهور..
المواطن باع الصوت
وبقى في الزنقة يدور...
الإدارة التزمت الصمت
ودوزت الأمور...
*************************
إلا مشيت عند المقدم
لا تبقاش كثير تخمم
خصك تجبد الدرهـم
ولا دويت تندم
*************************
إلا مشيت عند الشيخ
ما تسمع غير إيخ...
وكلامو ديال الجليـــخ
ولا دويت السليخ
*************************
إلا زرت القايد بّاهم
خصك تجبد إمّاهم
عاد يمكن تتفاهم
ولا دويت تصبح نادم
*************************
إلا دخلت عند الكوميسير
تلقى النفخة والتبندير
واش عندك ما تدير ..؟
إلا دويت محضر وتقرير
***********************
إلا بغيت تزور العامـــل
خصك تمشي كامــــــــل
مع الشاوش تعود واحل
ولا دويت تبقى حاصــل
************************
خص تكون فيك الفياقة
عند الدّرَكْ جبد اللعاقة
وحيد منك العياقــــــة
ولا دويت الفلاقــــــة
************************
إلا لقيت في الباب بو الروس
خصك تجبد الفـــلـــــــــــوس
ولا سير لسوس تســــــــوس
ولا دويت الجفاف والقادوس
*************************
إلا عندك سيارة من نوع "خزيت
"
وزيروك وطلبو " لاڨيزيـــــــــت"

ما عليك غير تجبد " التيكـــــيت"
وزد مازال المازوط والزيــــــت
ولا تتكلم لا تعاود حديـــــــــــث
*************************
إلا مشيت لصبيطار وانت مريض
خص جيبك يكون عامر عريض
ولا ما تسمع غير الكلام الغليظ
كيف الطبيب كيف الممــــــرض
************************
اشري الدوا ومعاه.. الابرة والخيط
وخلي ديما في جيبك... شي شايط
اعطي لهذا ادهن هذي ..تابعك اللغيط
صبر ولا ضرب راسك مع الحايـــــط
***********************
الدوا يتباع والقطن...في المخاد مخزون
تمشي لهم مريض ... ترجع مجنــــــون
وب" الرونديڨو " تبقى ديما مرهـــــون
*************************
الدوا الاحمر موجود و"الاسپيرين
"
تصلح لكل صداع
"
الپينيسيلين " فيها حكمـــــــة
ضد كل اوجاع
الطبيب ديما ما كاين غايــــــــب
أو في اجتماع
لمن تشكي ؟ الما فاض... وذاع
************************
إلا ساقتك الظروف..وداتك للمحكمــــة
خصك ترد بالك... واطلب السلامـــــة
لا تهضر..لاتغلط.. ليحسنو ليك بلا ما
يدفنوك وينساوك...حتى ليوم القيامة
ويڭولو راسو سخون فيه الفهامـــــة
*************************
مشيت وجيت كيف بغاو...وجريـــــــت
ما ڭلت آح ما ڭلت تفو... ماعييـــــــت
صبرت وزدت صبرت ...ما مليــــــــت
ما تصنتو لي ما سمعت منهم حديـــث
**********************
في باب المحكمة عدت نبـــــات
مع طول الايام حفظت القاعات
وعرفت فين كيتحرفو الملفـــــــات
المحامي ما قانع كيأجل الجلسات
***********************
سمحت في حقي ولداري ولــــــــــــــــيت
سولوني اهلي ما عرفت نجاوب ما دريت
واش نڭول القانون خص للي يحميه...
ولا نڭول ما بقيت عاقل ونســــــــــــيت
**************************
هرمتِ وما بقى ليك غير المــوت
بعتِ الفراش وكملت بالحانــــوت
حقك فات عليه الفـــــــــــــــــوت
كان خصك تعرف أ مسكيـــــن..
بللي الشاوش هو الســــاروت..
*************************
ڭالو الإدارة في خدمة المواطـــــــــن
لا فرق بين هذا وهذا الكل من الطين
الصغير عليه شرط والكبير شرطيـن
لكن الكبار على الصغار مسلطيــــــن
**************************
تغيير وإصـــــــلاح الإدارة
شحال سمعنا هذ العبــــارة
نطقتها افواه بحـــــــــرارة
وما رينا في الواقع غير المر والمرارة
*************************
ما ياخذ حقو غير مول المال...
وللي عندو ناسو
إلا بغيت تقضي على هذ الدّا...
وتحد من باسو
اقتل الحنش والحنش ما يموت
..
غير من راسو
نقي الدار وللي فيهم الدغل
ينوضو يتساسو
********************
رحمو المسكين في هذ البـــلاد
مدوه بالحق ديالو
يكفيه ظلم الزمان وهـــم الاولاد
وثقالت عليه حمالو
لا تزيدوه غم لا تشدو معاه عناد
ورفقو من حالو
*********************
ناس احرار ماتو على هذ البلاد
وفداوها بالسوم الغالــــــــــــي
شحال تعذبو عليها العبـــــــــاد
وشحال تڭال فيهــــم من اقوالي
جا بعدهم من دار فيها فســــــاد
واصبح لفوق عالي ... وبالعلالي





مع احترامي
لذوي الضمائر



الشريفة





الرجوع الى أعلى الصفحة اذهب الى الأسفل
 

فاتت الحملة........

استعرض الموضوع التالي استعرض الموضوع السابق الرجوع الى أعلى الصفحة 
صفحة 1 من اصل 1

 مواضيع مماثلة

-
» مذكرة الوفا في شأن دعم الحملة الدولية لكسر حصار القدس الشريف

صلاحيات هذا المنتدى:لاتستطيع الرد على المواضيع في هذا المنتدى
 :: المنتديات الأدبية :: الساحة الأدبيــة :: شعـر و خواطر-