" وَكاحة " رشيد نيني!!



لمغلغل*

Thursday, December 03, 2009

رشيد نيني وْكَحْ، مابقا لاقي علاش يكتب فالعمود الطويل ديالو، حيت كاع هادوك الناس اللي كان كيكتب عليهوم ولاو صحابو، الهمة، والماجيدي، وزيد عليهوم حتى ترّيكت لفّاسة، هاد حالة "الوَكاحة" اللي وصل ليها نيني خلاتو يولي يدير "كوبيي كولي" للمقالات ديال الناس لخرين، بلا مايشير للمصدر منين خداها- باش زعما ميديرش ليهوم الإشهار-، والإشارة للمصدر راها كيتعلموها الناس فأبجديات الصحافة.


المهم، القضية ومافيها أن السّي رشيد نيني بيراطا لينا المقال ديال الكاتب ديالنا "خنزور" بلا حشما بلا حيا من "هيسبريس-تريكيل"، واخا هو فيروس ولكن راه كيكتب مزيان، وخاطف الأضواء هاد الأيام، كلشي كيهضر عليه، وزدناه فالسالير، المهم، نيني شدّ المقال ديال السيّد ولصّقو فالعمود ديالو على أنه رسالة كتبها أحد القراء المجهولي الإسم، وكاع اللي خدم فالصحافة كيعرف هاد اللعيبة ديال "القرّاء" المجهولين اللي معندهوم سمية، أسيدي على الأقل دير سميت هاد "أحد القراء"، ما علينا، سيفطنا لسّي نيني رسالة محترمة كرد فعل حضاري باش يصلح الخطأ ديالو، الساعة السيّد دار صلعة من طين و صلعة من عجين، ومتسوقش لينا كاع، حتى أن الفيروس "خنزور" اللي كتب المقال كعا وبغا يمشي ليه يأنفيكتيه، الساعة طلبناه وكلنا ليه راه السيد معكّس من عند الله و "طوبيس" وحتى اللي خدامين معاه حايرين معاه.





عمليّا راه كلمة وحدة من المقال إيلا درتيها فمحرك البحث "جوجل" ولا "ياهو" ولا أي محرك بحث آخر غاديا تعطيك نتيجة وحدة، أن المقال ديال هيسبريس، هادي مافيها لا خود ولا آرا، يعني ماشي تعاير هيسبريس وتكول عليه "موقع مشبوه" فالأعمدة ديالك وفاللخر تشفر منو ليزارتيكل !! هادي ممهضوماش.. أسيدي مابقا عندك ما تكتب !؟ خود المقالات من عندنا، هانيا، مّت هانيا، ونقدرو نسيفطو ليك "خنزور" يبقا يكتب ليك كولا نهار كاع، بلا متبقاو تقجّو فالخبارات ديال و.م.ع وتعاودو تعجنوهوم فهاديك الجريدة عندكوم، ولكن بشرط، تخلّصو، مدّيرش ليه بحال هداك الكاريكاتيريست ديال "لوسوار" اللي مخلصتيهش، و كنتي كتخليه يتسنا من 11 صباح حتى 4 لعشية مسكين، و تسلت عليه من الباب لاخور.. حتى مشا فحالو.. ماعلينا، هدا ماشي موضوعنا دابا، خديتي المقال وعجبك،هانيا ، ولكن مافيها باس تدير المصدر، على الأقل غير من باب الاحترام لعملك كصحافي، ولا عرفتي أش غادي تدير، مالقيتي باش تعمّر هاديك العُقوبة اليومية اللي عندك ياك، عمّرها بهداك السّطوك ديال الشعر ديالك اللي مكيقراه حتى حدّ، ولا دير فيه شي إعلانات، راه الإعلانات خدامة مزيان هاد الأيام، و الماجيدي راه صحيبك ويوقف معاك فهاد القضية..


نوطة :


هادوك الطبقة ديال نيني وصحابو الـ3 اللي كيعمّرو معاه فروايال منصور وعاطينها للنميمة، وبايعين الماتش، وكيضحكو على الشعب بالسمية ديال النضال، غادي نتخصصو فيهوم هاد الأيام فتريكيل الالكترونية، وا ما كاين غير لفريش، آرا برّع !!


hespress