ما هموني غير ("الرجال") يلى ضاعو .. لحزاب يلى رابت كلها يبني حزب..... هادي تبريحا فخاطر المنصوري لي طارت ليه الحمامة... اللهم لا شماتة، والله يخرج عاقبتنا على خير، والله يجعل آخرنا حسن من أولنا، وباش قتلتي باش تموت، والله يستر، والله يخرجنا من دار العيب بلى عيب (أي إسقاطات على مكان ما فذلك من وحي خيال القارئ)... و فينما كان شي دعاء بحال هاكدا زيدوه من عندكم.
المهم لخبار فراسكم الإخوان، مزوار دا لكرسي من تحت المنصوري، ألف مبروك لوزير المالية، وألف مبروك لحركة التصحيح في حزب التجمع الوطني للأشرار، ديتوها ديتوها والله ما خليتوها. أما المنصوري الله يحسن عوانو، ولى مسكين تيغني: الحمام لي ولفتو مشا عليا كيندير انايا على فراقو... ولينا خايفين غير طير ليه لحمامة، عفوا لفريخ.
آآآآو هدشي ولى تيخلع، وا حتى من هاداك لوزير الجديد لي جابوه من برا، ياسر الزناكي، وزادوه لحزب الحمامة فالتشكيلة ديالها في المنتخب الحكومي، تاهو تقلب على المنصوري. سيد جاي من مدينة الضباب لندن والتاحق بالحكومة فالضبابية نيت، حيت فلول ما عرفوه واش أيزيدوه للأحرار ولى الحركة الشعبية، وزادت الضبابية ملي التاحق بالحركة التصحيحية ديال مزوار... لي فهم شي حاجة يفهمني... المهم نرجعو لموضوعنا، داكشي لي دارو للمنصوري مغيز، وسبابو دعا عليه الهمة، غيييير دعا عليه صافي.
هاد لخبار، حسب مسؤول مغيز تاهو، ملي سمعها القاديري مول حزب الساروت تفكر القالب لي داروه ليه وداو ليه الحزب، وغنى ديك الغناية ديال فتح الله المغاري: آ رجال الله فاش جات النوبة .. حنا زوار طالبين التوبة .. من عندو ساروت يحل الباب.... رووووول آ تراكتور ما عندو بكاج.